Bizkaia Gardena

ZER DA GARDENTASUNA

Gardentasuna bilatzen dugu: Edalontzi batean, itsasoan, pertsonengan. Azkenaldian, asko hitz egiten da gardentasunari buruz, baina zer esan nahi du zehazki? Erakunde publikoez hitz eginez gero, ZUK emandako baliabideekin funtzionatzen dutenez,gardentasuna da jakiteko eskubidea duzun informazio guztia ematea. Eskubidea duzu egiten diren jarduerei buruzko informazioa eskatzeko, zuri esker eta zuretzat egiten baitira. Erakunde publikoak gardenak izanez gero, zuk konfiantza handiagoa izango duzu haiengan eta haiek eraginkortasun handiagoz eta zure arazoetatik eta kezketatik hurbilago lan egingo dute. Nor arduratzen da autobusen zerbitzua kudeatzeaz? Zenbat diru inbertitzen da enplegua sustatzeko? Zein dira lehentasunak ingurumenaren arloan? Duela gutxira arte, horien antzeko galderei erantzuna aurkitzea ez zen batere erraza. Bizkaia aspalditik ari da informazio publikoa hedatzeko lanean, eta lurralde garden gisa aitortu da; hala ere, are urrunago iristea proposatu diogu geure buruari. Gardentasunari buruzko Foru Arau bat onartu da, eta gainera, erraz irakurtzeko moduko edizio bat ere argitaratu da, edukia hobeto azaltzeko. Batetik, konpromisoa hartu dugu modu proaktiboan eskaintzeko, zuk eskatu gabe, informazio hau: Nola funtzionatzen du eta antolatzen da Foru Aldundia eta foru erakunde publikoak? Nor dago goi mailako karguetan? Zer arau berri onartu dira edo onartuko dira? Zenbat diru sartzen da Bizkaiko Foru Aldundian? Zenbat gastatzen du eta zertan? Nori esleitu dizkio kontratuak eta zer zenbatekorekin? Zer programa, plan eta jarduera gauzatzen dituzte sailek? Zenbat pertsonak lan egiten dute Bizkaiko Foru Aldundian eta foru erakunde publikoetan? Bestalde, konpromisoa hartzen dugu informazio publikoari buruzko zure eskaera zehatzei erantzuteko hamabost eguneko epean. Zenbait kasutan, ezingo da informazioa eskaini. Nolanahi ere, ukapenarekin ados ez bazaude, Erreklamazio Batzordearen aurrean errekurtsoa jartzeko eskubidea izango duzu. Eta zera galdetuko diozu zure buruari: nondik hasiko naiz? Oso erraza da, dena Bizkaiko Foru Aldundiaren Gardentasun Atari berrian egongo delako. Atari honetan hainbat gairi buruzko informazioa eskuratu ahal izango duzu edozein gailutatik eta informazio zehatzari buruzko zure eskaerak izapidetu ahal izango dituzu egoitza elektronikoaren bidez. Gainera, aurrez aurre ere egin ahal izango duzu Foru Aldundiaren bulegoetan edo postaz. Gardentasuna da Bizkaia Goazen bimilaetahogeitahamar estrategiaren funtsezko konpromisoetako bat, eta Bizkaiko Foru Aldundiko langile guztiek bat egiten dute filosofia berri honekin. Dena dela, gainera, lantalde berezi bat ari da jarraipen eta kontrol lana egiten, informazioa eskuratzeko duzun eskubidea bete dadin. Bizkaiak urrats handia egin du lurralde are gardenagoa izateko, eta Foru Aldundiak, erakunde publikoak nahiz pribatuak eta herritarrek gardentasunarekiko konpromiso sendoa hartu dute. gardentasuna.bizkaia.eus

GARDENTASUN PUBLIKOA

Erakunde publikoen gardentasuna izan behar da herritarrek informazio publikoa eskuratzeko duten funtsezko eskubidearen emaitza.

INFORMAZIO PUBLIKOA LORTZEKO ESKUBIDEA

Argitaratutako informazioaz gain, edozein pertsonak informazio publikoa lortzeko eskubidea du, interesgarria iruditzen bazaio eta bakarrik Legeak xedatutako mugak kontuan hartuko dira. Ildo horri eutsiz, informazio publikoa lortzeko eskaera egin behar da.

Informazio publikotzat jotzen dira edozein euskarri edo formatutan dauden edukiak ala agiriak, Bizkaiko Foru Aldundiaren edo foru erakundeen esku badaude, beren funtzioak erabiliz egin edo erosi badituzte.

NOLA EGIN JAKINARAZIKO DIZUGU

Foru erakundeetan gardentasuna